RReth nesh

Posta e Kosovës është ndërmarrje publike në pronësi të shtetit të Kosovës, me aksionar 100% Qeverinë e Republikës së Kosovës, nën mbikëqyrjen e Ministrisë së Ekonomisë.

Me një rrjet prej 166 zyrash postare, Posta ofron shërbime postare dhe financiare në të gjitha regjionet, komunat dhe vendbanimet e thella të vendit, duke qenë një ndër institucionet më të afërta me qytetarët

Misioni ynë

Misioni i Postës së Kosovës është të ofrojë shërbime postare dhe komerciale me cilësi dhe besueshmëri, duke u njohur jo vetëm në rajon, por edhe ndërkombëtarisht, si dhe duke i përmbushur standardet e Bashkimit Evropian për cilësi.

Vizioni ynë

Vizioni i Postës së Kosovës është të ofrojë shërbime postare dhe komerciale për qytetarët, bizneset dhe institucionet, duke siguruar standarde të larta dhe shërbime inovative, në hap me zhvillimet më të fundit teknologjike.

Historiku i ndërmarrjes

Posta e Kosovës është ndërmarrje publike në pronësi të shtetit të Kosovës, me aksionar 100% Qeverinë e Republikës së Kosovës, nën mbikëqyrjen e Ministrisë së Ekonomisë. Me një rrjet prej 166 zyrash postare, Posta ofron shërbime postare dhe financiare në të gjitha regjionet, komunat dhe vendbanimet e thella të vendit, duke qenë një ndër institucionet më të afërta me qytetarët.

Shërbimi postar në Kosovë ka një histori të gjatë të zhvilluar në etapa të ndryshme, por nga viti 1959, me themelimin e PTT-së (Posta, Telefoni dhe Telegrafi), shërbimi postar fillon me një organizim dhe zhvillim të shpejtë. Ky sistem funksionoi deri në vitet ’90, kur pas suprimimit të autonomisë së Kosovës, pushteti serb largoi me dhunë punonjësit shqiptarë nga çdo institucion publik, përfshirë edhe Postën.

Pas çlirimit të Kosovës, më 2 gusht 1999, punonjësit e dëbuar u rikthyen në vendet e tyre të punës, duke shënuar fillimin e një etape të re për ndërmarrjen. Me vullnet të pathyeshëm dhe të mbështetur në Rregulloren e UNMIK-ut nr. 12/99, ata u angazhuan në rimëkëmbjen e Postës.

Në kushtet e vështira të pasluftës, u ngrit infrastruktura e domosdoshme për funksionimin e shërbimeve: u funksionalizuan zyra postare, u siguruan mjetet dhe pajisjet e nevojshme për rifillimin e shërbimeve postare, si: peshoret, formularët postarë, thasët dhe vulat postare, pullat, çmimorja e shërbimeve, formularët, numri postar dhe kodi i përkohshëm (XZ), të gjitha të aprovuara nga Unioni Postar Universal (UPU).

Më 31 maj 2000, Posta e Kosovës si njësi e PTK-së themeloi Departamentin e Postës së Pavarur Ndërkombëtare, duke u bërë pjesë e rrjetit global të shkëmbimit postar. Në kuadër të saj u themelua edhe Zyra Këmbyese Ndërkombëtare Prishtina LC/AO dhe CP, e cila plotësoi kriteret e UPU-së dhe i mundësoi Kosovës këmbimin e shërbimeve postare në të gjithë botën.

Më 1 korrik 2005, PTK-ja u shndërrua në korporatë (PTK Sh.A.), ku Posta e Kosovës funksiononte si njësi biznesi. Procesi i konsolidimit vazhdoi dhe më 21 maj 2012 Posta u regjistrua si Shoqëri Aksionare, ndërsa me vendim të Kuvendit të Kosovës, nga 1 gushti 2012, ajo funksionon si entitet i pavarur, i ndarë nga PTK-ja.